हरि बिनु कोऊ काम न आयौ -सूरदास

सूरसागर

द्वितीय स्कन्ध

राग गूजरी हरि बिनु कोऊ काम न आयौ। इहिं मावा झूठौ प्रपंच लगि, रतन सौ जनम गँवायौ। कंचन-कलस, विचित्र चित्रकरि, रचि पचि भवन बनायौ। तामैं तैं ततछनही काढ़यौ, पल भर रहन न पायौ। हों तव सँग जरौंगी, यौं कहि, तिया धूति धन खायौ। चलत रही चित चोरि, मोरि मुख, एक न पग पहुँचायौ। बोलि बोलि सुत-स्वजन-मित्रजन, लीन्यौ सुजस सुहायौ। परयौ सुकाज अंत की बिरियाँ, तिनहुँ न आनि छुड़ायौ। आसा करि करि जननी जायौ, कोटिन लाड़ लड़ायौ। तोरि लयौ कटिहू कौ डोरा, तापर बदन जरायौ। पतित-उधारन, गनिका-तारन, सो मैं सठ बिसरायौ। लियौ न नाम कबहुँ हूँ, सूरदास पछितायौ।।30।। इस पद के अनुवाद के लिए यहाँ क्लिक करें