लागे रुक्म गुहार संग -सूरदास

सूरसागर

दशम स्कन्ध

राग जैतश्री रुक्मिणी विवाह की दूसरी लीला लागे रुक्म गुहार संग सिसुपाल न छोडै । छाँडै बान विशाल जुद्ध ऐसौ को ओड़े ।। चक्र धरे हरि आवही सुनि असुरनि जिय गाज । टेरि कह्यौ सिसुपाल सौ, कीजै कंकन लाज ।। सकल सैन संहारि रुक्म हलधर गहि लीन्हौ । आगै इहि सौ काम रूक्मिनी सौ प्रन कीन्हौ ।। सात सिखा सिर राखि कै तब बूझी कुसलात । कुंडिनपुर कौ काज सँवारयौ, भूषनि कौ यह ख्यात ।। नगर बधाई बजी नाथ बहुतै सुख मान्यौ । पूरन कीन्हौ नेह रुक्म तै सत्यहि जान्यौ ।। कंकन छोरयौ द्वारिका बाज्यौ अनँद निसान । भुक्ति मुक्ति न्यौछावरी पाई ‘सूर’ सुजान ।। 4188।।