माधौ जू जोग कौ बोध बह्यौ -सूरदास

सूरसागर

दशम स्कन्ध

राग सोरठ माधौ जू जोग कौ बोध बह्यौ। स्याम सुमुख बिधु बचन सुधा रस, सो पुनि कछु न कह्यौ।। नव नव भाव तरंग महोदधि, सखि लोचन उमह्यौ। तुम जो कह्यौ ज्ञान कौ मारग़, पानी ह्वै सु बह्यौ।। सकल सिंगार हार रस सरबस, ब्रज नवनीत लह्यौ। छूँछे भाँड़े परयौ न पावै, लिखि तुम दियौ मह्यौ।। मोहि आचरज एक पै लागत, तुम पै जात सह्यौ। ‘सूर’ स्याम सुनि सखा सयानौ, लै भुज बीच गह्यौ।।4131।।