जुवति इक आवति देखी स्याम -सूरदास

सूरसागर

दशम स्कन्ध

राग देवगंधार जुवति इक आवति देखी स्याम। द्रुम कैं ओट रहे हरि आपुन, जमुना-तट गई बाम।। जल हलोरि, गागरि भरि नागरि, जबहीं सीस उठायौ। घर कौं चली जाय ता पाछैं, सिर तैं घट ढरकायौ।। चतुर ग्‍वालि करि गह्यौ स्‍याम कौ, कनक-लकुटिया पाई। औरनि सौं करि रहे अचगरी, मोसौं लगत कन्‍हाई।। गागरि लै हंसि देत ग्‍वारि-कर, रीतौ घट नहिं लैहौं। सूर स्‍याम ह्यां आनि देहु भरि, तबहि लकुट कर दैहौं।।1404।।