जाकौ मनमोहन अंग करै -सूरदास

सूरसागर

प्रथम स्कन्ध

राग देवगंधार              जाकौ मनमोहन अंग करै। ताकौ केस खसै नहिं सिर तैं, जौ जग बैर परै। हिरनकसिपु-परहार थक्‍यौ, प्रहलाद न नैंकु डरै। अजहूँ लगि उत्तानपाद-सुत, अविचल राज करै। राखी लाज द्रुपद तनया की, कुरुपति चीर हरै। दुरजोधन कौ मान भंग करि बसन प्रबाह भरै। जो सुरपति कोप्‍यौ ब्रज ऊपर क्रोध न कछू सरै। ब्रज-जन राखि नंद कौ लाला, गिरिधर बिरद धरै। जाकौ बिरद है गर्व-प्रहारी, सो कैसैं बिसरै? सूरदास भगवंत-भजन करि, सरन गए उबरै।।37।।