स्याम-कमल-पद-नख की सोभा -सूरदास

सूरसागर

दशम स्कन्ध

राग कान्हरौ स्याम-कमल-पद-नख की सोभा। जे नखचंद्र इंद्र सिर परसे, सिव बिरंचि मन लोभा।। जे नखचंद्र सनक मुनि ध्यावत, नहिं पावत भरमाही। ते नखचंद्र प्रगट ब्रजजुवती, निरखि निरखि हरषाही।। जे नखचंद्र फनिद हृदय तै, ऐकौ निमिष न टारत। जे नखचंद्र महा मुनि नारद, पलक न कहूँ बिसारत।। जे नख-चंद्र-भजन खल नासत, रमा हृदय जे परसति। ‘सूर’ स्याम-नख-चंद्र-बिमल-छवि, गोपीजन मिलि दरसति।।1806।।