सुनि सुग्रीव, प्रतिज्ञा मेरी -सूरदास

सूरसागर

नवम स्कन्ध

राग टोड़ी   दूसरैं कर बान न लैहौं। सुनि सुग्रीव, प्रतिज्ञा मेरी, एकहिं बान असुर सब हैहौं। सिव-पूजा जिहिं भाँति करी है, सोइ पद्धति परतच्छ दिखैहौं। दैत्य प्रहारि पाप-फल-प्रेरित, सिर माला सिव-सीस चढै़हौं। मनौ तुल-गन परत अगिनि-मुख, जारि जड़नि जम-पंथ पठैहौं। करिहौं नाहिं बिलंब कछू अब, उठि रावन सन्मुख ह्वै धैहौं। इमि दल दुष्ट देव-द्विज मोचन, लंक बिभीषन, तुमकौं दैहौं। लछिमन, सिया समेत सूर कपि, सब सुख सहित अजोध्या जैहौं॥157॥