रास रस मुरली ही तैं जान्‍यौ -सूरदास

सूरसागर

दशम स्कन्ध

राग केदारौ रास-रस मुरली ही तैं जान्‍यौ। स्‍याम-अधर पर बैठि नाद कियौ, मारग चंद्र हिरान्‍यौ।। धरनि जीव जल-थल के मोहे, नम-मंडल सुर थाके। तृन-द्रुम-सलिल-पवन गति भूले, स्रवन शब्‍द परयौ जाकै।। बच्‍यौ नहीं पाताल-रसातल, कितिक उदै लौं भान। नारद-सारद-सिव यह भाषत, कछु तनु रहौ न स्‍यान।। यह अपार रस रास उपायौ, सुन्‍यौ न देख्‍यौ नैन। नारायन धुनि सुनि ललचाने, स्‍याम अधर रस बेनु।। कहत रमा सौं सुनि-सुनि प्‍यारी बिहरत हैं बन स्‍याम। सूर कहाँ हमकौं वैसो सुख, जो बिलसतिं ब्रज-बाम।।1069।।