नैननि कौ मत सुनहु सयानी -सूरदास

सूरसागर

दशम स्कन्ध

राग सूही नैननि कौ मत सुनहु सयानी। निसि दिन तपत सिरात न कबहूँ, जद्यपि उमँगि चलत पल पानी।। हौ उपचार अमित उर आनति, खल भई लोकलाज कुलकानी। कछु न सुहाइ, दहत दरसनदव, वारिज-बदन-मद-मुसुकानी।। रूप-लकुट-अभिमान निडर ह्वै, अब उपहास न सुनत लजानी। बुधि विवेक बल बचन चातुरी, मनहुँ उलटि उन माँझ समानी।। आरजपथ गुरुज्ञान गुप्त करि, बिकल भई तनु दसा हिरानी। जाचत 'सूर' स्यामअंजन को, वह किसोर छवि जीव हितानी।।2365।।