जै गोबिंद माधव मुकुंद हरि -सूरदास

सूरसागर

दशम स्कन्ध

राग भैरव जै गोबिंद माधव मुकुंद हरि। कृपा सिंधु कल्यान कंस अरि।। प्रनतपाल केसव कमलापति। कृष्न कमल-लोचन अगतिनि-गति।। रामचंद्र राजीव-नैन-बर। सरन साधु श्रीपति सारँगधर।। बनमाली वामन बीठल बल। बासुदेव बासी ब्रज भूतल।। खर-दूखन-त्रिसिरासुर खंडन। चरन-चिह्न-दंडक-भुब-मंडन।। बकी-दवन बक-बदन-विदारन। बरुन-बिषाद-नंद-निस्तारन।। रिषि-मष-त्रान ताड़का-तारक। बन वसि तात-बचन-प्रतिपालक।। काली-दवन केसी-कर-पातन। अघ अरिष्ट धेनुक अनुघातन।। रघुपति प्रबल-पिनाक-बिभंजन। जग-हित जनक-सुता मन-रंजन।। गोकुल-पति गिरिधर गुन-सागर। गोपी-रवन रास-रति-नागर।। करुनामय कपि-कुल-हितकारी। बालि-बिरोधि कपट-मृग-हारी।। गुप्त-गोप-कन्या-ब्रत-पूरन। द्विज-नारी-दरसन-दुख चूरन।। रावन-कुंभकरन-सिर-छेदन। तरुवर सात एक सर भेदन।। संख चूड़-चानूर-सँहारन। सक्र कहै मम रच्छा-कारन।। उत्तर क्रिया गीध की करी। दरसन दै सबरी उद्धरी।। जे पद सदा संभु-हितकारी। जे पद परसि सुरसरी गारी।। जे पद रमा ह्दय नहिं टारै। जे पद तिहूँ भुवन प्रतिपारैं।। जे पद अहि-फन-फन-प्रति-धारी। जे पद बृंदा बिपिनि बिहारी।। जे पद सकटासुर संहारी। जे पद पांडव-गृह पग धारी।। जे पद रज गौतम-तिय तारी। जे पद भक्तनि कै सुखकारी।। सूरदास सुर जाँचत ते पद। करहु कृपा अपने जन पर सद।।981।।