जसुमति राधा कुँवरि सँवारति -सूरदास

सूरसागर

दशम स्कन्ध

राग गौरी जसुमति राधा कुँवरि सँवारति। बड़े बार सीमंत सीस के, प्रेम सहित निरुवारति।। माँग पारि बेनी जु सँवारति, गूँथी सुंदर भाँति। गोरैं भाल बिंदु बंदन, मनु, इंदु प्रात-रबि कौति।। सारी चीरि नई फरिया लै, अपने हाथ बनाइ। अंचल सौं मुख पोंछि अंग सब, आपुहि लै पहिराइ।। तिल चाँवरी, बतासे, मेवा, दियौ कुँवरि की गोद। सूर स्याम-राधा-तनु चितवत, जसुमति मन-मन मोद।।704।।