अन्ये स्म परिगायन्ति गोपा मुदितमानसा:।
गोपाला: कृष्णमेवान्ये गायन्ति स्म रतिप्रिया:।।26।।
तेषां स गायतामेव वादयामास वीर्यवान्।
पर्णवाद्यान्तरे वेणुं तुम्बीं वीणां च तत्र ह।।27।।
कदाचिच्चारयन्नेव गा: स गोवृषभेक्षण:।
जगाम यमुनातीरं लतालंकृतपादपम्।।28।।
तरंगापांगकुटिलां वारिस्पर्शसुखानिलाम्।
तां च पद्मोत्पलवतीं ददर्श यमुनां नदीम्।।29।।
सुतीर्थां स्वादुसलिलां ह्रदिनीं वेगामिनीम्।
तोयवातोद्यतैर्वेगैरवनामिपादपाम्।।30।।