भूय एव तु विप्रर्षे बलदेवस्य धीमत:।
माहात्म्यं श्रोतुमिच्छामि शेषस्य धरणीभृत:।।1।।
अतीव बलदेवं तं तेजराशिमनिर्जितम्।
कथयन्ति महात्मानं ये पुराणविदो जना:।।2।।
तस्य कर्माण्यहं विप्र श्रोतुमिच्छामि तत्त्वत:।
अनन्तं यं विदुर्नागमादिदेवं महौजसम्।।3।।
वैशम्पायन उवाच
पुराणे नागराजोऽसौ पठ्यते धरणीधर:।
शेषस्तेजोनिधि: श्रीमानकम्प्य: पुरुषोत्तम:।।4।।
योगाचार्यो महावीर्यो देवमन्त्रमुखो बली।
जरासंधं गदायुद्धे जितवान् यो न चावधीत्।।5।।