स्याम-अँग जुवती निरखि भुलानीं -सूरदास

सूरसागर

दशम स्कन्ध

राग गूजरी स्याम-अँग जुवती निरखि भुलानीं। कोउ निरखति कुंडल की आभा, इतनेहि माँझ बिकानी। ललित कपोल निरखि कोउ अटकी, सिथिल भई ज्यौं पानी। देह-गेह की सुधि नहिं काहूँ, हरषति कोउ पछितानी। कोउ निरखति रही ललित नासिका, यह काहू नहिं जानी। कोउ निरखति अधरनि की सोभा, फुरति नहीं मुख बानी। कोउ चक्रित भई दसन-चमक पर, चकचौंधी अकुलानी। कोउ निरखति दुति चिबुक चारु की, सूर तरुनि बिततानि।।644।।