स्याम कर मुरली अतिहिं बिराजति -सूरदास

सूरसागर

दशम स्कन्ध

राग नट स्याम कर मुरली अतिहिं बिराजति। परसति अधर सुधारस बरसति, मधुर मधुर सुर बाजति। लटकत मुकुट, भौंह-छबि मटकति, नैन-सैन अति राजति। ग्रीव नवाइ अटकि बंसी पर कोटि मदन-छबि लाजति। लोल कपोल झलक कुंडल की, यह उपमा कछु लागत। मानहुँ मकर सुधारस क्रीड़त, आपु-आपु अनुरागत। बृंदाबन बिहरत नँद-नंदन, ग्वाल सखा सँग सोहत। सूरदास प्रभु की छबि निरखत, सुर-नर-मुनि सब मोहत।।645।।