स्यामा स्याम सुभग जमुना जल -सूरदास

सूरसागर

दशम स्कन्ध

राग रामकली स्यामा स्याम सुभग जमुना-जल निभ्रम करत बिहार। पीत कमल इंदीबर पर मनु भोर भऐं नीहार।। श्रीराधा अंबुज कर भरि-भरि, छिरकति बारंबार। कनक-लता मकरंद भरत मनु, हालत पवन संचार।। अतिसी-कुसुम-कलेवर बूंदैं प्रतिबिंबित निरधार। जोतिसचक्र गगन सौं डोलत, सखि सब करतिं बिचार।। धाइ धरे वृषभानु-सुता हरि, मोहे सकल सिंगार। तड़ित जलद सूरज मानौ मिलि, वरषत अमृत धार।।1159।।