सूरसागर षष्ठ स्कन्ध पृ. 238

सूरसागर षष्ठ स्कन्ध-238 विनय राग 415.राग बिलावल - अजामिलोद्धार नाम सुनत त्यौं पाप पराहिं। पापी हू बैकुंठ सिधाहिं। यह सुनि दूत चले खिसियाइ। कह्यौ तिन धर्मराज सौं जाइ। अब लौं हम तुमहीं कौं जानत। तुमहीं कौ दँड-दाता मानत। आजु गह्यौ हम पापी एक। तिन भय मान्यौ हमकौ देख। नारायन सुत-हेतु उचारयौ। पुरुष चतुरभुज हमै निवारयौ। उनसौं हमरौ कछु न बसायौ। तातैं तुमकौ आनि सुनायौ। औरौ दँड-दाता कोउ आहि। हमसौ कयौं न बतावौ ताहि? धर्मराज करि हरि कौ ध्यान। निज दूतनि सौं कह्यौ बखान। नारायन सबके करतार। पालन अरू पुनि करत संहार। ता सम दुतिया और न कोइ। जो चाहै सो साजै सोइ। ताकौ तन जब नाम उचारयौ। तब हरि-दूतनि तुम्हैं निवारयौ। हरि के दूत जहाँ- तहाँ रहै। हम तुम उनकी सोध न लहैं। जो-जो मुख हरि-नाम उचारैं। हरि -गन तिहिं-तिहिं तुरत उधारैं। नाम महातम तुम नहिं जानौ। नाम-महातम सुनौ, बखानौं। ज्यौं त्यौं कोउ हरि-नाम उच्चरै। निस्चय करि सो तरै पै तरै। जाके गृह मैं हरि-जन जाइ। नाम कीरतन करै सौ गाइ। जद्यपि वह हरि-नाम न लेइ। तद्यपि हरि तिहिं निज-पद देइ। कैसौहू पापी किन होइ। राम-नाम मुख उचरै सोइ। तुम्हरौ नहीं तहाँ अधिकार। मैं तुमसौं यह कहौं पुकार। अजामील हरि-दूतनि देखि। मन मैं कीन्हौ हर्ष विसेषि।