सूरसागर प्रथम स्कन्ध पृ. 9

सूरसागर प्रथम स्कन्ध पृ. 9 विनय राग 17.राग रामकली और न काहुहि जन की पौर। जब जब दीन दुखी मयौ, तब तब कृपा करी बलबीर। गज बल-होन बिलोकि दसौ दिसि, तब हरि-सरन परयौ। करुनासिंधु, दयाल, दरस दै, सब संताप हरयौ। गोपी-ग्वाला-गाय-गोसुत-हित सात दिवस गिरि लीन्‍ह्मौ। मागध हत्‍यौ, मुक्त नृप कीन्‍हें, मृतक विप्र सुत दीन्‍ह्मौ। श्री नृसिंह बपु धरयौ असुर हति, भक्त-वचन प्रतिपारयौ। सुमिरत नाम, द्रुपद-तनया कौ पट अनेक विस्‍तारयौ। मुनि मद मेटि दास-व्रत राख्‍यौ, अंवरीष-हितकारौ। लाखा-ग्रह तै, सत्रु सैन तै पांडव-विपति निवारी। वरुन-पास व्रजपति मुकरायौ दावानल-दुख टारयौ। गृह आने वसुदेव-देवकी, कंस महा खल मारयौ। सो श्रीपति जुग जुग सुमिरन-बस, वेद बिमल जस गावै। असरन-सरन सूर जांचत है, को अब सुरति करावै। 18.राग केदारौ ठकुरायत गिरिधर की सांची। कौरव जीति युधिष्ठिर-राजा, कीरति तिहूँ लोक मैं मांची। ब्रह्म-रुद्र डर डरत काल कैं काल डरत भ्रू-भंग की आंची। रावन सौ नृप जात न जान्‍यौ, माया विषम सीस पर नाची। गुरु-सुत आनि दिए जमपुरे तैं बिप्र सुदामा कियौ अजाची। दुस्‍सासन कटि-बसन छुड़ावत कुमिरत नाम द्रौपदी बांची। हरि-चरनारविद तजि लागत अनत कहूं, तिनकी मति कांची। सूरदास भगवंत भजत जे, तिनकी लीक चहूँ जुग खांची।