मुरली हरि तैं छूटति है -सूरदास

सूरसागर

दशम स्कन्ध

राग भैरव मुरली हरि तैं छूटति है। वाही कैं बस भए निरंतर, व‍ह अधरनि रस लूटति है।। तुम तैं निठुर भए वह बोलत, तिन तैं मन उघटावति है। आरज-पथ, कुल कानि मिटावति, सबकौं निलज करावति है।। निदरे रहति, डराति नहिं काहुँ, मुंह पाऐं वह फूलति है। अब वह हरि तैं होति न न्यारी, तू काहे कौं भूलति है।। रोम-रोम नख-सिख रम पागी, अनुरागिनि हरि प्यारी है। सूर स्याम वाकैं रस लुबधे, जानी सौति हमारी है।।1239।।