ब्रज भयौ महर कैं पूत -सूरदास

सूरसागर

दशम स्कन्ध

राग आसावरी ब्रज भयौ महर कैं पूत जब यह बात सुनी। सुनि आनंदे सब लोग, गोकुल गनक-गुनी। अति पूरन पूरे पुन्य, रोपी सुथिर थुनी। ग्रह-लगन-नषत-पल सोधि, कीन्ही बेद-धुनी। सुनि धाइँ सब ब्रजनारि, सहज सिंगार किये। तन पहिरे नूतन चीर, काजर नैन दिये। कसि कंचुकि, तिलक लिलार, सोभित हार हिये। कर-कंचन, कंचन-थार, मंगल-साज लिये। सुभ स्रवननि तरल तरौन, बेनी सि‍थिल गुही। सिर बरषत सुमन सुदेस, मानौ मेघ फुही। मुख मंडित रोरी रंग, सेंदुर माँग छुही! उर अंचल उड़त न जानि, सारी सुरँग सुही।