प्रगट करौं अब तुमहिं बताऊँ -सूरदास

सूरसागर

दशम स्कन्ध

राग बिलावल प्रगट करौं अब तुमहिं बताऊँ। चिकुर चमर, घूंघट हय-बर, बर भ्रुव-सारँग दिखराऊँ।। बान-कटाच्छ, नैन खंजन, मृग, नासा सुक उपमाऊँ। तरिवन चक्र, अधर बिद्रुम-छबि, दसन बज्र-कन ठाऊँ।। ग्रीव कपोत, कोकिला बानी, कुच घट-कनक सुभाऊँ। जोबन-मद रस-अमृत भरे हैं, रूप रंग झलकाऊँ।। अंग सुगंध बास पाटंबर, गनि-गनि तुमहिं सुनाऊँ। कटि केहरि गयंद-गति सोभा, हंस सहित इकनाऊँ।। फेरि कियै कैसैं निबहति हौ, घरहिं गए कहँ पाऊँ। सुनहु सूर यह बनिज तुम्हारैं, फिरि-फिरि तुमहि मनाऊँ।।1553।।