देखि री देखि आनँद-कंद -सूरदास

सूरसागर

दशम स्कन्ध

राग केदारी देखि री देखि आनँद-कंद। चित्त-चातक-प्रेम-धन, लोचन-चकोरनि-चंद।। चलित कुंडल गंड-मंडल झलक ललित कपोल। सुधा सर जनु मकर क्रीड़त, इंदु डह डह डोल। सुभग कर आनन समीपै, मुरलिका इहिं भाइ। मुन उभै अंभोज-भाजन, लेत सुधा भराइ। स्याम-देह दुकूल-दुति मिलि, लसति तुलसी-माल। तड़ित धन संजोग मानौ, स्रेनिका सुक-जाल। अलक अबिरल, चारु हास-बिलास, भृकुटो भंग। सूर हरि की निरखि सोभा, भई मनसा पंग।।627।।