ऐसे और बहुत खल तारे।
चरन-प्रताप, भजन-महिमा कौं को कहि सकै तुम्हारे।
दुखित गयंद, दुष्ट मति गनिका, नृग कूप उधारे।
विप्र बजाइ चल्यौ सुत कैं हित, कटे महा दुख भारे।
व्याघ, गीध, गौतम की नारी, कहाँ कौन व्रत धारे ?
केसी, कंस, कुबलया, मुष्टिक, सब सुख-धाम सिधारे।
उरजनि कौं विष बाँटि लगायौ, जसुमति की गति पाइ।
रजक-मल्ल-चानूर-दवानल-दुख,-भंजन सुखदाई।
नृप सिसुपाल महा पद पायौ, सर-अवसर नहिं जान्यौ।
अध-बक तृनावर्त-धेनुक इति, गुन गहि दोष न मान्यौ।
पांडु-बधू पटहीन सभा मैं कोटिनि बसन पुजाए।
विपति काल सुमिरत तिहिं अवसर जहाँ तहाँ उठि धाए।
गोप गाइ-गोसुत जल-त्रासत, गोबर्धन कर धारयौ।
संतत दीन, हीन अपराधी, काहैं सूर विसारयौ ?।।158।।
इस पद के अनुवाद के लिए यहाँ क्लिक करें