आदर सहित बिलोकि स्याम-मुख -सूरदास

सूरसागर

दशम स्कन्ध

राग कान्हरौ आदर सहित बिलोकि स्याम-मुख, नंद अनंद-रूप लिए कनियाँ। सुंदर स्याम-सरोज-नील-तन, अंग-अंग सुभग सकल सुखदनियाँ। अरुन चरन नख-जोति जगमगति, रुन-झुन करति पाई पैजनियाँ। कनक-रतन-मनि-जटित-रचित कटि किंकिनि कुनित पीतपट तनियाँ। पहुँची करनि, पदिक उर हरि नख, कठुला कंठ मंजु गज-मनियां। रुचिर चिबुक-द्विज-अधर नासिका अति सुंदर राजति सुबरनियां। कुटिल भृकुटि, सुख को निधि आनन, कल कपोल की छबि न उपनियां। भाल तिलक मसि-बिंदु बिराजत, सोभित सीस लाल चौतनियां। बाल सुभाव बिलोल बिलोचन, चो‍रति चि‍तहिं चारु चितवनियां। निरखतिं ब्रज-जुवती सब ठाढ़ी, नंद-सुवन-छबि चंद-बदनियां। सूरदास प्रभु निरखि मगन भए, प्रेम-विबस कछु सुधि न अपनियाँ।।106।।