आजु हरि ऐसौ रास रच्यौ -सूरदास

सूरसागर

दशम स्कन्ध

राग केदारौ आजु हरि ऐसौ रास रच्यौ। स्रवन सुन्यौ‍ न कहूँ अवलोक्यौ यह सुख अब लौं कहाँ संच्यौ।। प्रथमहिं सँचे, समाज साज सुर, सब मोहे, कोऊ न बच्यौ। एकहिं बार थकित थिर चर कियौ, को जानै को कबहिं नच्यौ! गत गुन-मद-अभिमान अधिक रुचि लै लोचन मन तहँइ खच्यौ। सिव-नारद-सारदा कहत यौं, हम इतने दिन बादि पच्यौ।। निरखि नैन रस-रीति रजनि रुचि, काम-कटक फिर कलह मच्यौ। सूर धनुष-धीरज न धरयौ तब, उलटि अनंग अनंग तच्यौ।।1139।।