मुक्ताहारोर्मिबहुलां मांसमेद: सपंकिनीम्।
छत्रद्वीपां शरावर्तां रथै: पुलिनमण्डिताम्।।61।।
केयूरकुण्डंलाकूर्मां ध्वजमत्स्य विभूषिताम्।
नागग्राहवतीं रौद्रामसिनक्रविभूषिताम्।।62।।
केशशैवलसंछन्नां श्रोणिसूत्रमृणालिकाम्।
वराननसुपद्मां च हंसचामरवीजिताम्।।63।।
शिरस्तिमिसमाकीर्णां शोणितौघप्रवर्तिनीम्।
नदीं दुस्तमरणीं भीमामनंगेन प्रवर्तिताम्।।64।।
दुष्प्रेक्षां दुर्गमां रौद्रां हीनतेज: सुदुस्तराम्।
शस्त्रग्राहवतीं घोरां यमराष्ट्र विवर्द्धनीम्।।65।।
