सूरसागर प्रथम स्कन्ध पृ. 77

सूरसागर प्रथम स्कन्ध-77 विनय राग 155.राम धनाश्री जनम तौ बादिहि गयौ सिराइ। हरि-सुमिरन नहिं गुरु की सेवा, मधुवन बस्‍यौ न जाई। अब की बार मनुष्‍य-देह धरि, कियौ न कछू उपाइ। भटकत फिरयौ स्‍वान की नार्इ नैकु जूठ कैं चाह। कबहूँ न रिझए लाल गिरिधरन, विमल-विमल जस गाई। प्रेम सहित पग बाँधि घूंघरू सक्‍यौ न अंग नचाइ। श्री भागवत सुनी नहिं स्त्रवननि नैंकहुँ रुचि उपजाइ। आनि भक्ति करि, हरि-भक्तिनि के कबहुँ न धोए पाइ। अब हौं कहा करौं करूनामय, कीजै कोन उपाइ। भव-अंबोधि, नाम-निज-नौका, सूरहि लेहु चढाइ। इस पद के अनुवाद के लिए यहाँ क्लिक करें 156.राग गौरी माधौ जू, तुम कब जिय बिसरौ ? जानत सब अंतर की करनी, जो मैं करम करयौ। पतित-समूह सबै तुम तारे, हुतौ जु लोक भरयौ। हौं उनतैं न्‍यारौ करि डारयौ, इहिं दुख जात मरयौ। फिर-फिर जोनि अनंतनि भरम्‍यौ, अब सुख ‘सरन परयौ। इहिं अवसर कत बाँह छुड़ावत, इहिं डर अधिक डरयौ। हौं पापी, तुम पतित-उबारन, डारे हौं कत देत ? जौ ज नौ यह सूर पतित नहिं, तौ तारौ निज हेत। इस पद के अनुवाद के लिए यहाँ क्लिक करें