127.राग धनाश्री
सोइ कछु कीजै दीन-दयाल।
जाते जन छन चरन न छांड़े करुना-सागर भक्त-रसाल।
इंद्री अजित, बृद्धि विषयारत, मन की दिन-दिन उलटी चाल।
काम-क्रोध-मद-लोभ-महाभय, अह-निसि नाथ, रहत बेहाल।
जोग-जुगति, जप-तप, तीरथ-व्रत, इनमैं एकौं अंक न भाल।
कहा करौं, किहि भाँति रिभावौं, हौं तुमकौ सुंदर नंदलाल।
सुनि समरथ, सरवज्ञ, कृपानिधि, असरन सरन, हरन जग-जाल।
कृपानिधान, सूर की यह गति, कासौं कहै कृपन इहि काल।।
इस पद के अनुवाद के लिए यहाँ क्लिक करें
128.राग गूजरी
कृपा अब कीजिऐ बलि जाउं।
हौं असौच, अक्रित, अपराधी, सनमुख होत लजाउं।
तुम कृपाल, करुनानिधि, केसव, अधम-उधारन-नाउं।
काकैं द्वार जाइ होउं ठाढ़ौ, देखत काहि सुहाउं।
असरन सरन नाम तुम्हारौ, हौं कामी, कुटिल, निभाउं।
कलुषी अरु मन मलिन बहुत मैं सेंत-मेंत न बिकाउं।
सूर पतितपावन पद अंवुज, सो क्यौं परिहरि जाउं।
इस पद के अनुवाद के लिए यहाँ क्लिक करें