सूरसागर प्रथम स्कन्ध पृ. 60

सूरसागर प्रथम स्कन्ध-60 विनय राग 121.राग आसावरी कवहूँ तुम नाहिंन गहरु कियौ। सदा सुभाव सुलभ सुमिरन बस, भक्तनि अभै दियौ। गाइ सुभाव सुलभ सुमिरन बस, भक्तनि अभै दियौ। अध-अरिष्‍ट केसी, काली मथि दावान लहिं पियौ। कंस-बंस बधि, जरा संध हति, गरु-सुत आनि दियौ। दरषत सभा द्रुपद-तनया कौ अंवर अछय कियौ। सूर स्‍याम सरवज्ञ कृपानिधि, करुना-मृदुल-हियौ। काकी सरन जाउं नंदनंदन, नाहिंन और बियौ। 122.राग सारंग तातै तुम्‍हरौ भरोसौ आवै। दीनानाथ पतित-पावन, जस वेद-उपनिषद गावै। जौ तुम कहौ कौन खल तारयौ, तौ हौं बोलौं राखी। पुत्र-हेत सुर लोक गयो द्विज, सक्‍यौ न कोऊ राखी। गनिका किए कौन ब्रत-संजम, सुक-हित नाम पढ़ावै। मनसा करि सुमिरयौ गज बपुरै, ग्राह प्रथमगति पावै। बकी जु गई घोष मैं छल करि, जसुदा को गति दीनी। और कह त सत्रुति, वृषभ-ब्‍याध की जैसी गति तुम कीनी। द्रुपद-सुताहि दुष्‍ट दुरजोधन सभा माहिं प्रकरावै। ऐसौ और कौन करुनामय, बसन-प्रवाह बढ़ावै। दुखित जानिकै सुत कुबेर के तिन्‍ह लगि आपु बंधावै। ऐसौ को ठाकुर, जन-कारन दुख सहि, भलौ मनावै। दुरबासा दुरजोधन पठयौ पांडव-अहित बिचारी। साक पत्र लै सबै अघाए, न्‍हात भजे कुस डारी। देवराज मष-भंग जानि कै बरष्‍यौ ब्रज पर आई। सूर स्‍याम राखे सब निज कर, गिरि लै भए सहाइ।