मैया मोहिं दाऊ बहुत खिझायौ -सूरदास

सूरसागर

दशम स्कन्ध

राग गौरी मैया मोहिं दाऊ बहुत खिझायौ। मौसौं कहत मोल कौ लीन्हौ, तू जसुमति कब जायौ। कहा करौं इहि रिस के मारे खेलन हौं नहिं जात। पुनि-पुनि कहत कौन है माता, को है तेरौ तात। गोरे नंद, जसोदा गोरी, तू कत स्यामल गात। चुटकी दै-दै ग्वाल नचावत, हँसत सबै मुसुकात। तू मोहीं कौं मारन सीखी, दाउहिं कबहुँ न खीझै। मोहन-मुख रिस की ये बातै, जसुमति सुनि-सुनि रीझै। सुनहु कान्ह, बलभद्र चबाई, जनमत ही कौ धूत। सूर स्याम सोहिं गोधन की सौं, हौं माता तू पूत।।215।।