मानहु मेघ घटा अति बाढ़ी -सूरदास

सूरसागर

दशम स्कन्ध

राग मलार मानहु मेघ घटा अति बाढ़ी । बरषत बान बूँद सेना पर, महा नदी रन गाढ़ी ।। वरन वरन बादर बनैत अरु दामिनि कर करवार । गरज निसान घोर सखध्वनि, हय, गय हीस, चिघार ।। उड़त धूरि धुरवा दसहूँ दिसि, सूर सक्ति जलधार । प्रगटत दुरत देखियत रवि सम, दोउ बसुदेव कुमार ।। कुजर कूल गिरात रथी रथ, स्रोनित सलिल गँभीर । धनुष तरंग, भँवर स्यंदन पद, जलचर सुभट सरीर ।। उड़त जु धुजा पताक छत्र रथ, तरुवर टूटत तीर । परम निसंक समर सरिता तट, क्रीड़त जादव वीर ।। सूने किए भवन भूपति के, सुबस किए सुर लोक । छिनक मध्य हरि हरे कृपा करि, उन सबहिनि के सोक ।। आनंदे मधुबन के बासी, गुनी नगर के लोक । जरासिंधु कौ जीति ‘सूर’ प्रभु, आए अपने ओक ।। 4162 ।।