माधौ जू के तन की सोभा -सूरदास

सूरसागर

दशम स्कन्ध

राग कल्यान माधौ जू के तन की सोभा, कहत नहीं बनि आवै। अँचवत सादर दोउ लोचन-पुट, मन नाहीं तृपितावै।। सघन मेघ अति स्याम सुभग बपु, तडि़प बसन, बन माल। सिर-सिषंड, बन-धातु बिराजत सुमन सुरंग प्रबाल।। कछुक कुटिल कमनीय सघन अति गोरज-मंडित केस। अंबुज रुचि पराग पर मानौ, राजत मधुप सुदेस।। कुंडल लोल कपोल किरनि-गन, नैन कमल-दल, मीन। अधर मधुर मुसुकानि मनोहर, करत मदन-मन हीन।। प्रति प्रति अंग अनंग-कोटि-छबि, सुनि सखि परम प्रबीन। सूर दृष्टि जहँ जहाँ परति, तहँ तहीं रहति ह्वै लीन।।1382।।