पिछवारै ह्वै बोलि सुनायौ -सूरदास

सूरसागर

दशम स्कन्ध

राग धनाश्री पिछवारै ह्वै बोलि सुनायौ। कमलनयन हरि करत कलेऊ, कर नाहिंन आनन लौ आयौ।। गाइ एक बन ब्याइ रही है, याही मिस आतुर उठि धायौ। बेनु न लियौ, लकुट नहि लीन्ही, हरबराइ कोउ सखा न बुलायौ।। चौंकि परे चकित ह्वै जित तित, सत्य आहि की सुपन भुलायौ। फूरे फिरत अंक नहि मावत, मानहुँ सुधाकिरनि छबि छायौ।। मिलि बैठे संकेत-लता-तर, कियौ सबै जितनौ मन भायौ। 'सूरदास' सुंदरी सयानी, उलटि अंक गिरिधर पर नायौ।।1985।।