नैंकु गोपालहिं मोकौं दै री -सूरदास

सूरसागर

दशम स्कन्ध

राग बिहागरौ नैंकु गोपालहिं मोकौं दै री। देखौं वदन कमल नीकैं करि, ता पाछै तू कनियां लै री। अति कोमल कर-चरन-सरोरुह-अधर-दसन-नासा सो‍है री। लटकन सीस, कंठ मनि भ्राजत, मनमथ कोटि वारनैं गै री। बासर-निसा बिचारति हौं सखि, यह सुख कबहुँ न पायौ मैं री। निगमनि-धन सनकादिक-सरबस बड़े भाग्य पायौ है तैं री। जाकौ रूप जगत के लोचन, कोटि चंद्र-रवि लाजत भै री। सूरदास बलि जाइ जसोदा, गोपिनि-प्रान पूतना-‍बैरी।।55।।