जसुदा मदन गोपाल सोवावै -सूरदास

सूरसागर

दशम स्कन्ध

राग बिहागरौ जसुदा मदन गोपाल सोवावै। देखि सयन-गति त्रिभुवन कंपै, ईस बिरंचि भ्रमावै। असित-अीरुन सित आलस लोचन उभय पलक परि आवै। जनु रवि गत संकुचित कमल जुग, निसि अलि उड़न न पावै। स्वास उदर उससित यौं, मानौ दुग्ध-सिंधु छबि पावै। नाभि-सरोज प्रगट पदमासन उतरि नाल पछितावै। कर सिर-तर करि स्याम मनोहर, अलक अधिक सोभावै। सूरदास मानौ पन्नगपति, प्रभु ऊपर फन छावै।।65।।