ग्वालिनि अपने चीरहिं लै री -सूरदास

सूरसागर

दशम स्कन्ध

राग रामकली ग्वालिनि अपने चीरहिं लै री। जल तैं निकसि-निकसि तट, दोउ कर जोरि सीस दै दै री।। कत हौं सीत सहति ब्रज-सुंदरि, ब्रत पूरन सब भै री। मेरे कहैं आइ पहिरौ पट, कृस तन हेम जरै री।। हौं अंतरजामी जानत सब, अति यह पैज करै री। करिहौं पूरन काम तुम्हारौं, रास सरद-निसि ठै री।। संतत सूर स्वभाव हमारौ, कत भै-काम डरै री। कौनेहुँ भाव भजै कोउ हमकौं, तिन तन-ताप हरै री।।787।।