गोकुल कौ कुल-देवता -सूरदास

सूरसागर

दशम स्कन्ध

राग बिलावल गोकुल कौ कुल-देवता, श्री गिरिधर लाल। कमल नयन घन-साँवरौ, बपु‍-बाहु-बिसाल।। हलधर ठाढ़े कहत हैं, हरि के ये ख्याल। करता हरता आपुहीं, आपुहिं प्रतिपाल।। वेगि करौ मेरे कहैं, पकवान रसाल। वह मधवा बलि लेत है, नित करि-करि गाल।। गिरि गोबर्धन पूजियै, जीवन गोपाल। जाफे दीन्हैं बाढ़हीं गैया, गन-जाल।। सब मिलि भोजन करत हैं, जहँ-तहँ पसु-पाल। सूरदास डरपत रहैं, जातैं जम काल।।823।।