वैशम्पायन उवाच
तौ तु वृन्दावनं प्राप्तौ वसुदेवसुतावुभौ।
चेरतुर्वत्सयूथानि चारयन्तौ सुरूपिणौ।।1।।
पूर्णस्तु घर्मसमयस्तयोस्तत्र वने सुखम्।
क्रीडतो: सह गोपालैर्यमुनां चावगाहतो:।।2।।
तत: प्रावृडनुप्राप्ता मनस: कामदीपिनी।
प्रववर्षुर्महामेघा: शक्रचापांकितोदरा:।।3।।
बभूवादर्शन: सूर्यो भूमिश्चादर्शना तृणै:।
पतता मेघवातेन नवतोयानुकर्षिणा।।4।।
सम्मर्जिततला भूमिर्यौवनस्थेव लक्ष्यते।।5।।