(41)
धनि यशुदा बड़ भागिनि जायो,
सत चित आनन्द गोद खिलायो।। टेर ।।
धनि धनि बाबा नन्द हमारो,
निज सुत कह जेहि लाड़ लड़ायो।।
धनि धनि बृज वृन्दावन रज धनि,
जेहि रज महँ हरि खेलन आयो।। 1 ।।
धनि धनि ग्वाल बाल सब बृज के
जेहि सँग मोहन गाय चरायो।।
धनि धनि गोपी बृज मण्डल की,
दे दे माखन नाच नचायो।। 2 ।।
धनि धनि जमुना तट बंशीवट,
कर धर मुरली श्याम बजायो।।
धनि धनि मन मोहन की गैया,
गिरि पर चढ़ हरि टेर बुलायो।। 3 ।।
धनि गोवरधन देव हमारो,
धर अँगुली हरि आप पुजायो।।
‘श्यामसखा’ धनि धनि शिव शंकर
ज्योतिष बनकर मरम जनायो।। 4 ।।