(209)
प्रिय प्रान नाथ मनमोहन सुन्दर प्यारे,
छिनहूँ मति मेरे होहु दृगन ते न्यारे।। टेर ।।
घनश्याम गोप गोपी पति गोकुल राई,
निज प्रेमीजन हित नित नित नव सुखदाई।
प्रानहु ते प्यारे प्रियतम मीत कन्हाई,
वृन्दावन रक्षक बृज सरबस बल भाई।
श्री राधा नायक यशुदानन्द दुलारे,
छिनहूँ मति मेरे होहु दृगन ते न्यारे।। 1 ।।
तव दर्शन बिनु तन रोम रोम दुख पागे,
तव सुमिरन बिनु यह जीवन विष सम लागे।
तुम्हरे सँयोग बिनु यह जीवन दुख दागे,
अकुलात प्रान जब कठिन मदन मन जागे।
मम दुख जीवन के तुम हो इक रखवारे,
छिनहूँ मति मेरे होहु दृगन ते न्यारे।। 2 ।।