तन कौ कन-कन मेरौ होवै -हनुमान प्रसाद पोद्दार

पद रत्नाकर -हनुमान प्रसाद पोद्दार

श्रीराधा के प्रेमोद्गार-श्रीकृष्ण के प्रति

राग जंगला - ताल कहरवा तन कौ कन-कन मेरौ होवै तेरे सुख कौ साधन। प्रतिपल जीवन में होवै, बस, तेरौ सुख-‌आराधन॥ परम लाभ मेरौ सुख तेरौ, तेरौ सुख अतुलित धन। तेरे सुख के अमित दुखों में, कटें सभी दुख-बन्धन॥ मो कूँ मिलैं व्याधि, पीड़ा, अपमान, नरक, भव-बन्धन। तो कूँ जदि सुख होय नैकु जो तिन तैं हे जीवनधन!॥ तौ वे व्याधि-जातना सगरी करि अति सुख-संपादन। देयँ परम आनंद मोय, करि तुच्छ मुक्ति-सुख ते‌इ छन॥ बुद्धि रमै तेरे सुख में, मन रत नित तुव सुख-चिंतन। बिसरै अन्य कल्पना, उर में छाय रहै तव सुख-घन॥ प्रियतम-सुख अति मधुर नित्य सर्वत्र दिव्य सुख-पावन। प्रियतम सुख हो प्रियतम हूँ तैं अधिक सुखद, मन-भावन॥