स्याम मोरे ढिग तें कबहुँ न जावै -हनुमान प्रसाद पोद्दार

पद रत्नाकर -हनुमान प्रसाद पोद्दार

श्रीराधा माधव लीला माधुरी

राग कामोद - तीन ताल स्याम मोरे ढिग तें कबहुँ न जावै। कहा कहूँ सखि ! गैल न छाड़ै, जित जाऊँ तित धावै॥ गैया दुहत गोद आ बैठे, दूध धार पी जावै। दही मथत नवनीत लेबे कौं, मटकी माहिं समावै॥ रोटी करत आ‌इ चौका में, ऊधम अमित मचावै। जेंवत बेर संग आ बैठै, माल-माल गटकावै॥ सखियन सँग बतरात आ‌इ सो पंचराज बनि जावै। मुरली मधुर बजाय देखु सखि, मोहन हमहिं रिझावै॥ सोवत समै सेज आ पौढ़ै, गृह-स्वामी बनि जावै। स्वल्प निंदरिया बीच सपन महँ माधुरि-रूप दिखावै॥ तदपि न बरजत बनै ताहि सखि ! चित अति ही सुख पावै। बारहिं बार निहारि चंद्र-मुख, अंतर अति हुलसावै॥