सरन परि मन-बच-कर्म बिचारि -सूरदास

सूरसागर

नवम स्कन्ध

राग मारू   सरन परि मन-बच-कर्म बिचारि। ऐसौं और कौन त्रिभुवन मैं, जो अब लेइ उबारि। सुनु सिख कंत, दंत तृन धरि कै, त्यौं परिवार सिधारौ। परम पुनीत जानकी सँग लै, कुल-कलंक किन टारौ। ये दससीस चरन पर राखौ, मेटौ सब अपराध। हैं प्रभु कृपा करन रघुनंदन रिस न गहैं पल आघ। तोरि धनुष, मुख मोरि नृपनि कौ, सीय स्वयंवर कीनौ। छिन इक मैं भृगुपति-प्रताप-बल करषि, हृदय धरि लीनौ। लीला करत कनक-मृग मारयौ, वध्यौ बालि अभिमानी। सोइ दसरथ-कुलचंद अमित बल, आए सारँगपानी। जाकैं दल सुग्रीव सुमंत्री, प्रबल जूथपित भारी। महा सुमट रनजीत पवन-संत, निडर बज्र-वपु-धारी। करिहै लंक पंक छिन भीतर, बज्र-सिला लै धावै। कुल-कुटुंब-परिवार सहित तोहिं बाँधत विलम न लावै। अजहूँ बल जनि करि संकर कौ, मानि वचन हित मेरौ। जाइ मिलौ कोसल नरेस कौं भ्रात विभीषन तेरौ। कटक सोर अति घोर दसौं दिसि, दीसति बनचर-भीर । सूर समुझि रघुबंस-तिलक दोउ उतरे सागर-तीर॥115॥