रे कपि, क्यौं पितु-वेर बिसारयौ -सूरदास

सूरसागर

नवम स्कन्ध

राग मारू   रे कपि, क्यौं पितु-वेर बिसारयौ? तो समतुल कन्या किन उपजी, जो कुल-सत्रु न मारयौ! ऐसौ सुभट नहीं महिमंडल देख्यौ बालि-समान। तासौं कियौ बैर मैं हारयौ, कीन्हीं पैज प्रमान। ताकौ बध कीन्हौ इहिं रघुपति तुव देखत विदमान। ताकी सरन रहयौ क्यौं भावै, सब्द न सुनियै कान। रे दसकंध अंध-मति, मूरख, क्यौं भूल्यौ इहिं रूप? सूझत नहीं बीसहू लोचन, परयौ तिमिर कैं कूप। धन्य पिता, जापर परफुल्लित राघव-भुजा अनूप। वा प्रताप की मधुर बिलोकनि पर वारौं सब भूप। जौ तोहिं नाहिं बाहु-बल-पौरुष, अर्घ राज देउँ लंक। मो समेत ये सकल निसाचर, लरत न मानैं संक। जब रथ साजि चढ़ौं रन सन्मुख, जीय न आनौं तंक। राघव सेन समेत सँहारौं, करौं रुघिरमय पंक। श्रीरघुनाथ-चरन-व्रत उर धरि, क्यौं नहिं लागत पाइ? सवके ईस, परम करूनामय, सवही कौं सुखदाइ। हौं जु कहत, लै चलौ जानकी, छाँड़ौ सवै ढिठान। सनमुख होइ सूर के स्वामी, भक्तनि कृपा-निधान॥134॥