राघौ जू, कितिक बात, तजि चिंत -सूरदास

सूरसागर

नवम स्कन्ध

राग केदारौ हनुमंत-वचन   राघौ जू, कितिक बात, तजि चिंत। केतिक रावन-कुंभकरन-दल सुनियै देव अनंत। कहौ तौ लंक लकुट ज्यों फेरौं, फेरि कहूँ लै डारौं। कहौ तौ परबत चाँपि चरन तर, नीर-खार मैं गारौं। कहौ तौ असुर लंगूर लपेटौं, कहौ तौ नखिन विदारौं। कहौ तौ सैल उपारि पेड़ि तै, दै सुमेरु सौं मारौं। जेतिक सैल-सुमेरु धरनि मैं, भुज भरि आनि मिलाऊँ। सप्त समुद्र देउँ छाती तर, एतिक देह बढ़ाऊँ। चली जाउ सैना सब मोपर, घरौ चरन रघुबीर। मोहि असीस जगत-जननी की, नवत ज बज्र-सरीर । जितिक बोल बोल्यौ- तुम आगैं, राम प्रताप तुम्हारैं। सूरदास प्रभु की सौं साँचे, जन करि पैज्ञ पुकारै॥107॥