मेघ दल-प्रबल ब्रज-लोग देखैं -सूरदास

सूरसागर

दशम स्कन्ध

राग गौड़ मलार मेघ दल-प्रबल ब्रज-लोग देखैं। चकित जहँ-तहँ भए, निरखि बादर नए, ग्वाल गोपाल डरि गगन पेखैं।। ऐसे बादर सजल, करत अति महाबल, चलत घहरात करि अंधकाला। चकित भए नंद, सब महर चकित भए, चकित भए नर-नारि हरि करत ख्याला।। घटा घनघोर घहरात, अररात, दररात, थररात ब्रज लोग डरपे। तडित आघात तररात, उतपात सुनि, नारि-नर सकुचि तन प्रान अरपे।। कहा चाहत होन, भई कबहूँ जौ न, कबहूँ आँगन भौन बिकल डोलैं। मेटि पूजा इंद्र, नंद-सुत गोबिंद, सूर-प्रभु आनँद करि कलोलैं।।855।।