भुवन चतुर्दस राज सकल -सूरदास

सूरसागर

दशम स्कन्ध

राग जैतश्री रुक्मिणी विवाह की दूसरी लीला भुवन चतुर्दस राज सकल 'सूरदास' नर मुनि देवा । कर जोरे ससि सूर पवन पानी करै सेवा ।। अबहि ओर की और होति कछु लागै बारा । तातै पाती लिखी तुमहि मै प्रान अधारा ।। कै जदुपति लै आवहु, करौ प्रान लगि घाउ । बाजै सखहि जानि हौ, आए जादवराउ ।। कटै भूख औ नीद जीव हौ जानति नाही । अनदेखे वै नैन लगे लोचन पथ माही ।। जो माँगौ सो देउँ लेहु माधौ सँग आए । कोटि जज्ञ फल होइ पिता उन दरसन पाए ।। रोइ रुकमिनी यौ कह्यौ धरौ पानि मैं माथ । यह पाती लै दीजियौ, प्राननाथ कै हाथ ।।