बिकानी हरि-मुख की मुसुकानि -सूरदास

सूरसागर

दशम स्कन्ध

राग सारंग बिकानी हरि-मुख की मुसुकानि। पर बस भर्इ फिरति सँग निसि दिन, सहज परी य बानि।। नैननि निरखि बसीठी कीन्ही, मन मिलयौ पय पानि। गहि रति-नाथ लाज निज पुर तैं, हरि कौं सौंपी आनि।। सुनि री सखी स्याम सुंदर की, दासी सब जग जानि। जोइ जोइ कहत सोई कृत, आयसु माथैं मानि।। तजि कुल-लाज, लोक-मरजादा, पति-परिजन-पहिचानि। सूर सिंधु-सरिता मिलि जैसैं, मनसा-बूंद हिरानि।।1656।।