गोकुल जनम लेहु सँग मेरैं, जो चाहत सुख कीन्हौ।
जेहिं माया बिरंचि सिव मोहे, वहै बानि करि चीन्हौ।
देवकि गर्भ अकर्षि रोहिनी, आप बास करि लीन्हौ।
हरि कैं गर्भ-बास जननी कौ बदन उजारौ लाग्यौ।
मानहुँ सद-चंद्रमा प्रगट्यौ, सोच-तिमिर तन भाग्यौ।
तिहिं छन कंस आनि भयौ ठाढ़ौ देखि महातम जाग्यौ।
अबकी बार आपु आयौ है अरी, अपुनपौ त्याग्यौ।
दिन दस गएँ देवकी अपनौ बदन बिलोकन लागी।
कंस-काल जिय जानि गर्भ मैं, अति आनंद सभागी।
सुर-नर-देव बंदना आए, सोवत तैं उठि जागी।
अबिनासी कौं आगम जान्यौ, सकल देव अनुरागी।
कछु दिन गएँ गर्भ कौ आलस, उर-देवकी जनायौ।
कासौं कहौं सखी कोउ नाहिंन, चाहति गर्भ दुरायौ।
बुध-रोहिनी-अष्टमी-संगम, बसुदेव निकट बुलायौ।
सकल लोकनायक, सुखदायक, अजन, जन्म धरि आयौ।
माथैं मुकुट, सुभग पीतांबर, उर सोभित भृगु-रेखा।
संख-चक्र-गदा-पदम बिराजत, अति प्रताप सिसु-भेषा।
जननी निरखि भई तन ब्याकुल, यह न चरित कहुँ देखा।
बैठी सकुचि, निकट पति बोल्यौ, दुहुँनि पुत्र-मुख पेखा।
सुनि देवकि, एक आन जन्म की, तीकौं कथा सुनाऊँ।
तैं मांग्यौ, हौं दियौ कृपा करि, तुम सौ बालक पाऊँ।
सिव-सनकादि आदि ब्रह्मादिक ज्ञान ध्यान नह आऊँ।
