बाँसुरी बिधि हूँ तैं परबीन -सूरदास

सूरसागर

दशम स्कन्ध

राग मलार बाँसुरी बिधि हूँ तैं परबीन। कहियै काहि आहि को ऐसौ, कियौ जगत आधीन।। चारि बदन उपदेस बिधाता, थापी थिर-थिर नीति। आठ बदन गरजति गरबीली, क्यौं चलिहै यह रीति।। बिपुल बिभूति लही चतुरानन, एक कमल करि थान। हरि-कर कमल जुगल पर बैठी, बाढ़यौ यह अभिमान।। एक बेर श्रीपति के सिखऐं, उन आयौ गुरु ज्ञान। याकैं तो नंदलाल लाड़िलौ, लग्यौ रहत नित कान।। एक मराल-पीठि आरोहन, बिधि भयौ प्रबल प्रसंस। इन तौ सकल बिमान किये, गोपी-जन-मानस-हंस।। श्री बैकुंठनाथ-पुरबासी, चाहत जा पद-रैनु। ताकौ मुख सुखमय सिंहासन, करि बैठी यह ऐनु।। अधर-सुधा पी कुल-व्रत टारयौ, नहीं सिखा नहिं ताग। तदपि सूर या नंद-सुवन कौं, याहीं सौं अनुराग।।1247।।